काठमाडौं विश्वविद्यालयको स्कूल अफ एजुकेशन Kathmandu University School of Education र बाजुराको बडीमालिका नगरपालिकाबीच प्राविधिक तथा व्यावसायिक शिक्षा र तालिम (TVET) क्षेत्रको विकासका लागि आज (26 December 2025) समझदारीपत्रमा हस्ताक्षर भएकाे छ। समझदारीपत्रमा काठमाडौं विश्वविद्यालय, स्कूल अफ एजुकेशनका डिन प्रा.डा. बाल चन्द्र लुइटेल र बडीमालिकाका नगर प्रमुख अमर बहादुर खड्काले हस्ताक्षर गर्नुभएको थियो ।

सम्झौता अनुसार काठमाडौं विश्वविद्यालयको विकास शिक्षा विभागअन्तर्गत रहेको "सेन्टर फर स्किल्स एन्ड सोसाइटीज" ले बडीमालिका नगरपालिकामा कार्यरत TVET शिक्षकहरूको क्षमता अभिवृद्धि गर्नेछ। साथै, स्थानीय आवश्यकतामा आधारित स्थानीय पाठ्यक्रम विकास तथा शिक्षा रणनीति योजना (Education Strategy Plan) तयार गर्न नगरपालिकालाई प्राविधिक तथा शैक्षिक सहयोग प्रदान गर्नेछ।

यस सहकार्यले स्थानीय तहमा सीपमूलक तथा रोजगारमुखी शिक्षाको गुणस्तर सुधार गर्न, शिक्षकहरूको पेशागत दक्षता बढाउन र स्थानीय आवश्यकता अनुरूप शिक्षा प्रणाली विकास गर्न महत्वपूर्ण योगदान पुग्ने विश्वास लिइएको छ।

दुवै संस्थाले यो सहकार्यलाई दीर्घकालीन रूपमा अघि बढाउँदै स्थानीय तहमा प्रभावकारी TVET कार्यक्रम सञ्चालन गर्ने प्रतिबद्धता व्यक्त गरेका छन्।

श्रम, रोजगार तथा सामाजिक सुरक्षा मन्त्रालयअन्तर्गतको राष्ट्रिय व्यवसायिकप्रशिक्षण प्रतिष्ठान National Academy of Vocational Training-NAVT र प्राविधिक प्रशिक्षण प्रतिष्ठान Training Institute for Technical Instruction - TITI बीच सीपमूलक तालिमकाे पाठ्यक्रम विकाससम्बन्धी सहजकर्ताहरूको प्रशिक्षण कार्यक्रम सञ्चालन गर्ने विषयमा औपचारिक सम्झौता सम्पन्न भएको छ।

आज पौष ११ गते TITI मा भएको सम्झौतामा NAVT का कार्यकारी निर्देशक रमेश कुमार बखती र TITI का कार्यकारी निर्देशक अनुज भट्टराईले हस्ताक्षर गर्नुभएको थियो ।

उक्त प्रशिक्षण कार्यक्रम स्विस सरकारको आर्थिक सहयोगमा सञ्चालन भइरहेको SaMi Programme को प्राविधिक सहयोगमा कार्यान्वयन हुनेछ, जसलाई Helvetas Nepal ले सञ्चालन गरिरहेको छ।

सम्झौताअनुसार प्रशिक्षण सफलतापूर्वक सम्पन्न भएपछि राष्ट्रिय व्यवसायिक तालिम प्रतिष्ठानले आर्थिक वर्ष २०८२/०८३ भित्र विभिन्न पेशागत क्षेत्रमा १५ वटा सीपमूलक तालिम पाठ्यक्रम विकास गर्ने योजना बनाएको छ।

ती पाठ्यक्रमहरू राष्ट्रिय पेशागत दक्षता मापदण्ड (National Occupational Competency Standards) अनुरूप तयार गरिने र श्रम बजारको वास्तविक आवश्यकतामा आधारित हुने जनाइएको छ।

यस पहलले दक्ष जनशक्तिको क्षमता अभिवृद्धि गर्नुका साथै रोजगारी प्रवर्द्धन र उद्योगको आवश्यकता अनुसारको सीप विकासमा महत्वपूर्ण योगदान पुर्‍याउने विश्वास लिइएको छ।

TVET क्षेत्रको सुदृढीकरण तथा सीप–रोजगार–उद्योगबीचको समन्वय मजबुत बनाउने दिशामा यो कदमलाई महत्वपूर्ण उपलब्धिका रूपमा हेरिएको छ।